.jpg "The News Reporter")
ગુજરાતમાં જયારે જયારે કોઈ ગંભીર ગુના બને છે. ત્યારે આપણી પોલીસ જાહેરમાં આરોપીઓનો વરઘોડો કાઢીને રિકંસ્ટ્રક્શન હાથ ધરે છે. આ પછી , આ વરઘોડાની રીલો ખુબ વાઇરલ થાય છે. લોકો હજારોની સંખ્યામાં ઘટના સ્થળ પર ઉમટી પડે છે. ત્યારે હવે રાજ્યના ઇન્ચાર્જ પોલીસ વડા ડૉ. કે.એલ.એન. રાવે રાજ્યના તમામ પોલીસ અધિકારીઓને ગુજરાત હાઇકોર્ટનો એક કેસ ટાંકીને ‘કાયદામાં રહેશો તો ફાયદામાં રહેશો’ તેવી લેખિત ચેતવણી આપી છે. નજીક ભૂતકાળમાં આપણે ઘણાએવા ઉદાહરણો જોયા હશે જેમાં , ગુજરાતની પોલીસ આરોપીઓનો જાહેરમાં વરઘોડો કાઢે છે. આ પછી આરોપીઓની જાહેરમાં સર્વિસ થાય છે , તેમને જાહેરમાં બે હાથ જોડીને માફી મંગાવડાવામાં આવે છે. આ માટે નાયબમુખ્યમંત્રી હર્ષ સંઘવી પોતે જાહેર મંચ પરથી પોલીસની પીઠ થપથપાવી ચુક્યા છે.
તો હવે , રાજ્યના ઇન્ચાર્જ પોલીસ વડા ડૉ. કે.એલ.એન. રાવે 4 પાના ભરીને વિસ્તૃત પત્ર લખીને રાજ્યના પોલીસના અધિકારીઓને ચેતવણી આપી છે. રાજ્યના પોલીસ વડા કે.એલ.એન. રાવે ગુજરાત હાઇકોર્ટના એક કેસને ટાંકીને ચેતવણી આપી છે. આરોપીની જાહેરમાં પરેડ નહીં કરાવવી, આરોપીને હિંસાત્મક ટોળાથી બચાવવો, આરોપી સાથે ગેરવર્તણૂક કરવી નહીં તેમજ આરોપીનું આત્મ સન્માન જળવાય તેવો વ્યવહાર કરવો વિગેરે વિગેરે સૂચના ડૉ. રાવે પોલીસ અધિકારીને આપી છે. તેમણે પત્રમાં લખ્યું છે કે, આરોપીના વરઘોડા અને જાહેરમાં માર મારવાની ઘટનાઓને લઈને ગુજરાત પોલીસની છબી ખરડાઈ છે અને પોલીસની સારી કામગીરી ઢંકાઈ જાય છે. પ્રજામાં પોલીસની છાપ ખરાબ ઉભી થાય છે. આરોપીઓના માનવ અધિકારનું હનન કરનારા અધિકારી/કર્મચારી વિરૂદ્ધ શિક્ષાત્મક કાર્યવાહી કરવાની રહેશે. આ ઉપરાંત આવી ઘટનાઓમાં સિનિયર અધિકારીઓ જવાબદાર ગણાશે.ઘણાબધા હાઈપ્રોફાઈલ કેસોમાં પોલીસ આરોપીઓને ઘટના સ્થળે લઇ જઈ પંચનામું હાથ ધરે છે , તેમનો વરઘોડો કાઢે છે. આ ઉપરાંત હજારો લોકો પણ સ્થળ પર ઉમટી પડતા હોય છે.
જેમ કે, થોડાક સમય અગાઉ , ચિરાગ ગોટીનું સુરતમાં સરઘસ કઢાયું હતું , આ પછી પાટણમાં જે ઈસમોએ પોલીસ પર હુમલો કર્યો હતો તેમનું ચાણસ્માની બજારમાં સરઘસ નીકળ્યું હતું. આ પછી સુરતમાં પાટીદાર યુવતીના કેસમાં પોલીસે આરોપીનું સરઘસ કાઢ્યું હતું. હવે , જયારે જયારે આવી કોઈક ગંભીર ગુનાની દુર્ઘટના બને કે તરત જ પીડિત પરિવાર વરઘોડો કાઢવાની વાત કરતુ હોય છે. પરંતુ એક વસ્તુ ચોક્કસ છે કે , આ વરઘોડો માત્ર રીલમાં અટેંશન મેળવવાનું એક માધ્યમ બની ચુક્યો છે. છેલ્લે પીડિતો ન્યાય માટે વર્ષો સુધી વલખા મારતા હોય છે.
