લોકો પગપાળા, ખચ્ચર પર અથવા હેલિકોપ્ટરમાં કરે છે ચારધામ યાત્રા
આ વખતે સૌથી વધુ કમાણી ખચ્ચરવાળાઓએ કરી
દયનીય સ્થિતિમાં કામ કરતા 250 જેટલા ખચ્ચરોના આ વર્ષે મોત થયા

ચારધામ યાત્રામાં કમાણી કરવામાં ખચ્ચરોએ હેલિકોપ્ટરોને હંફાવ્યા!! બે વર્ષથી નવરા બેઠેલા પાલખીવાળા પણ આ વર્ષે લાખો રુપિયા કમાઈ શક્યા. ઉત્તરાખંડમાં ચારધામ યાત્રા રુટ પર 8,664 ખચ્ચરો કાર્યરત, આ વર્ષે રાત-દિવસ યાત્રીકોને લઈ જવામાં અનેક ખચ્ચરોના પણ દયનીય સ્થિતિમાં મોત નીપજ્યા. સરકારે ટેક્સ અને રજિસ્ટ્રેશન ફી પેટે 8 કરોડની કમાણી કરી.

ચાર ધામની યાત્રા કરવા દર વર્ષે લાખો લોકો જતા હોય છે. એક સમય હતો જ્યારે લોકો પગપાળા યાત્રા કરતા અથવા ખચ્ચરની સવારી કરતા. જોકે, હવે તો હેલિકોપ્ટર સર્વિસ શરુ થતાં આ યાત્રા ઝડપી અને વધુ સગવડભરી બની છે, પરંતુ તાજેતરમાં જ સંપન્ન થયેલી ચારધામ યાત્રામાં હેલિકોપ્ટર સર્વિસ પૂરી પાડતી કંપનીઓ કરતાં ખચ્ચરવાળાઓએ વધુ આવક રળી હોવાનું સામે આવ્યું છે.

ઉત્તરાખંડ સરકારના સત્તાવાર આંકડા અનુસાર, આ વર્ષે 15 લાખ યાત્રાળુ ચારધામની યાત્રા કરવા આવ્યા હતા. જેમાંથી 5.3 લાખ લોકોએ ખચ્ચરની સવારી કરી હતી. જેના થકી ખચ્ચરના માલિકો 101.3 કરોડ રુપિયા કમાયા હતા, જ્યારે બીજી તરફ હેલિકોપ્ટર સેવા પૂરી પાડતી કંપનીઓ 75.80 કરોડ રુપિયા કમાઈ શકી છે. બીજી તરફ, પાલખીવાળા 86 લાખ રુપિયા કમાયા છે. પાલખી, હેલિકોપ્ટર અને ખચ્ચરવાળાએ આ સીઝનમાં કુલ 190 કરોડ રુપિયાની કમાણી કરી છે.

ઉત્તરાખંડમાં 4,302 ખચ્ચર માલિકો નોંધાયેલા છે, જ્યારે ખચ્ચરોની સંખ્યા 8,664 ખચ્ચરોની સરકારમાં નોંધણી થયેલી છે. હાલ ઉત્તરાખંડમાં નવ હેલિકોપ્ટર ફર્મ્સ કાર્યરત છે, જે કેદારનાથ રુટ ઉપરાંત સિરસી, ફાટા અને ગુપ્તકાશીના રુટ પર સેવા પૂરી પાડે છે.

કેદારનાથ ટ્રેક રુટ 17 કિલોમીટર લાંબો છે, જ્યારે યમુનોત્રી ધામને ગુરુવારે જ યાત્રીકો માટે બંધ કરી દેવાયો છે, જે 5 કિલોમીટર લાંબો ટ્રેક છે. યમુનોત્રી રુટ પર ખચ્ચર માલિકો 22 કરોડ રુપિયા કમાયા છે. કેદારનાથ અને યમુનોત્રીમાં ખચ્ચર માલિકો, હેલિકોપ્ટર ફર્મ્સ અને પાલખીવાળા કુલ 211 કરોડ રુપિયા કમાયા છે. બીજી તરફ, સરકારને તેમાંથી ટેક્સ અને રજિસ્ટ્રેશન ફી પેટે 8 કરોડ રુપિયાની આવક પ્રાપ્ત થઈ છે.

યમુનોત્રીમાં હેલિકોપ્ટર સર્વિસ નથી, જ્યાં ખચ્ચર માલિકો 22 કરોડ કમાયા છે. આ રુટ પર 2,900 ખચ્ચર માલિકો નોંધાયેલા છે. ઉત્તરાખંડના સીએમ પુષ્કરસિંહ ધામીના જણાવ્યા અનુસાર, બે વર્ષથી કોરોનાને કારણે ચારધામ યાત્રા બંધ હોવાથી તેના પર જ ગુજરાન ચલાવતા લોકો કફોડી સ્થિતિમાં મુકાયા હતા. આ વર્ષે રેકોર્ડ સંખ્યામાં યાત્રીકો આવતા તેઓ બે વર્ષ દરમિયાન થયેલા નુક્સાનની ભરપાઈ કરી શક્યા છે. સીઝન દરમિયાન આ રુટ પર આવતી હોટેલ્સ અને ધર્મશાળા પણ ભરેલી રહી હતી. હવે આ રુટ પર રોપવે પ્રોજેક્ટ પણ આકાર લેશે, જે યાત્રાને વધુ સરળ અને સુગમ બનાવશે.

ગુપ્તકાશી-કેદારનાથ રુટ પર હેલિકોપ્ટરની રાઉન્ડ ટ્રીપની ટિકિટ રુ. 7,750 રુપિયા થાય છે. જ્યારે ફાટાથી કેદારનાથની ટુ-વે ટિકિટનો દર 4,720 અને સિરસી-કેદારનાથ રુટની ટિકિટ 4,680 રુપિયા છે. હેલિકોપ્ટર સામાન્ય રીતે કેદારનાથ પહોંચવામાં 15-30 મિનિટ જેટલો સમય લે છે. જ્યારે ખચ્ચર પર ત્યાં પહોંચતા 8 કલાક થાય છે. ખચ્ચર પર કેદારનાથ પહોંચવા માટે એક વ્યક્તિએ 2500 રુપિયા ચૂકવવા પડે છે.